25يــــنـــــايـــــــر الجزء الاول 25يــــنـــــايـــــــر الجزء الاول

ماقبل ثورة 25 يناير
نيران الغضب
25 يناير
قبل التاريخ ده
كنا بنلف ف دواير
إللى شاف سلطة
ومولد صاحبه كان غايب
ومال سايب
سرق طبعا
وإللى ليه سلطة
وحط إيدينه فى جيوبنا
وشاف جبنا
قام إتفرعن
وإللى طالح
مستخبى فى إللى صالح والمصالح
كلها ماشية بوساطة
وإللى عاند
وإللى ملهوش ضهر ساند
مهما عاند
فرصته ضايعة ببساطة
وإللى ضد الفقر كافح
وإللى عافر
وإللى من همه إللى طافح
راح مسافر
وإللى قال دى حقوقنا لازم
قالوا فيه وعليه ده كافر
ماللى عايز حقه لازم
تبقى ليه فى إيديه ضوافر
وإللى قال تحيا البلد
قالوا واد مشاغب وإتجلد
وإللى كان فعلا ولد
من تانى راغب يتولد
ماسابش بلده وهج
وصرخ وقال أحتج
إللى شال علمك وعلمى
وإللى نادى بالخلاص
إللى كان فى هتافه سلمى
وإللى قابلوه بالرصاص
إللى كان عايز يعمر
قالوا ده هو إللى دمر
وكان سبب كل الخساير

25 يناير
قبل التاريخ ده
كنا بنعد الخساير
كنا عايشين
هربانين من نفسنا
حابسين آلامنا فى نفسنا
وعمرنا ماقلنا أى
وبنجرى ورا أحلامنا جرى
وكل لحظة علينا كانت بتفوت
حاجات جوانا كانت بتموت
لحد مــا حلمنا بخلاص
وكان خلاص
إحساسنا زي
قلم رصاص
من كتر أوجاعه إتشرخ
وفى يوم بعلو الصوت
صرخ
وقال ياناس
بكفاية بري
ده الهم ساحق
وإحنا مش عارفين نلاحق
مركب العمر إللى ساير

25 يناير
قبل التاريخ ده
كنا فى إيديهم سجاير
لما تخلص واحدة
ياخدو واحدة غيرها
وحلمنا بالوحدة
حلم فى دنيا غيرها
قالولنا واحدة بواحدة
نعدل خط سيرها
وبكرة هتبان البشاير
والبلد مليان كوادر
إللى غنى بإسم وطنى
وكان بيعزف ع الدرامز
وإللى عامل فيها وطنى
وإن إسمه لمصر رمز
وإللى حزبه حزب وطنى
وبعينيه مبطلش غمز
باع لغيره حديد وصادر
وإللى فيه شيطانه توغل
ولضميره خد مسكن
وإللى وظف وإللى شغل
وإللى جوز وإللى سكن
وإللى كان دايما مشغل
إسطوانة بكرة ممكن
والشباب بالعزم قادر
إللى قال سهل الجواز
والجنيه هزم الدولار
باع بكام ألف الجهاز
وإشترى المتر بدولار
وإللى باع بترول وغاز
وسابلنا الجاز والسولار
وإمتحان تدريس وكادر
واللى كان لينا وحبيبنا
وإللى عيشنا فى أمان
وبقانون طارئ يجيبنا
والخروج مالهوش ضمان
وبسلاح ورصاص ضربنا
حاربنا وبداعى الأمان
وهو بالضرب إللى بادر
وإللى يوم فجر كنيسة
عشان مايعمل فتنة عامة
وبسبل وطرق رخيصة
كان بيشعل نار فى أمة
وإللى كان عايزها هيصة
نروح مانتلمش فى لمة
وكان عميل خاين وغادر
وخانا يوم ماتش الجزاير
وكان لابد فى يوم نثور
نغضب بجد ومش مناورة
نقوم نقول للظلم غور
وبجد قمنا عملنا ثورة
فى 25 يناير
ــــــــــــــــــــــــــــــــــــــــــــــــــــــــ
تابع .....................الجزء الثانى والاخير
حقوق الطبع والنشر محفوظه©2011
محاسب محمد حامد
[b]

[img][ندعوك للتسجيل في المنتدى أو التعريف بنفسك لمعاينة هذا الرابط]